كيف مات هالمرة !!

- كيفك يا حجة؟
-الحمد لله يا إبني
- أنا جاي كرمال بلغك خبر مش حلو
- عارفة وحاسة من لما دق الباب
- شو عارفة يا حجة؟
- إبني إستشهد صح؟
- إيه يا حجة الله يصبرك ويعطيك الصحة والبقية بحياتك
- ليش واقف برا فوت فوت ضيفك قهوة
- قهوة يا حجة ! عم قلك إبنك مات
- عارفة يا إبني شو شايفني خرفانة!! إبني ميت من زمان بس خبرني كيف مات هالمرة؟
- كيف مات هالمرة !! كان واقف ع حاجز بطرابلس مع أصحابه العسكر وإجى إرهابي قوص عليهن وعلى مركز قوى الأمن وابنك استشهد مع ٢ رفقاتو وشابين متل الورد من قوى الأمن الداخلي
= يا إبني ما حدا بيهرب من قدره أنا عارفة إنو إبني رح يموت بس كنت عم حاول خليه حدي أطول فترة ممكنة!! إبني ميت من زمان لما تخرج من كلية الهندسة وما لاقى شغل، ومات مرة تانية لما حب وحدة وكان نفسه يتجوزها وتركها لأنو ما قدر يجيب شقة ولا يجمع حق عرس، ومات مرة تالتة لما اشتغل شوفير تاكسي وهو خريج هندسة، ومات كمان مرة لما أبوه مات وشال همي وهم مرضي وهو ما كان معو حتى يطعمي حالو، ومات مرة لما ...
- خلص يا حجة دخيلك خلص والله مش عارف شو بدي قلك عموماً ما تزعلي الحكومة رح تدفعلك تعويض كرمال تقدري تعيشي منو بعد إبنك
- خليهن للحكومة يا إبني ما بدي ياهن، قلك شو!! قلهن يشتروا أكاليل فيهن، قلهن إم حسن بتقلكن إشتروا أكاليل بالمصريات وزينوا قبر إبني..
#إم_شهيد
#قصة_وطن