كلمة السيدة ماجدة الرومي الوطنية في جامعة ال N.D.U. ليل الأحد الماضي
""★.. الآباء الأجلاء جميعاً..
اصدقائي الأجلاء،
★ بيقول "مار بولس" برسالته الأولى لأهل" كورانتيوس":
{{ "إن كنتُ أنطُق بِألسِنةِ الناسِ والملائكة.. وليست فيى "المحبة"... فإنما أنا نُحاس يَطنُّ وصنجٌ يرنّ""
...قدّيه حلو هالحكي..
وقدّيش فعلا" الإنسان مايقدر يكون إنسان إلاّ بالمحبة..
"بس ببلد: النحاس بيطن والصنج بيرن صعب تحكي محبة"....
..مهما نكون عم نحكي عن علاقتنا مع مسؤولين وبحدد بالذات المتورط منهم بِدمّنا ودموعنا وهني سامعين صريخ وجعنا وشايفين بأي "مصيبة" نحنا ومش سألانين... وكأنهن هني مسؤولين بغير مدينة بغير مطرح أو مسؤولين عن حالهن...بس.
صعب تحكي محبة
وإلاّ صعب تفهم كيف هالناس فِضيوا هيك من إنسانيتهن..
ليش خانوا..؟
ليش خانوا الشعب؟
..اللبنانيي بيقدروا يعملوا كتير للبنان لو أتحلن مجال..
..ليش خانوا لبنان..؟
..ليش وصلونا لهون..؟
وصلنا بالصدفة..؟..لأ..
..في سيناريو سياسي محكم تطبق علينا من أول الحرب ال75..ويمكن من69..
كتبوه محترفين بكتابة سيناريوهات سياسية تطبق على الشرق العربي كله متل ماشايفين بكتير من الدول العربية..
والهدف قد مايقدروا يفضوا الأرض من الناس بيكون كتير منيح من أهلها يعني..
ولقيوا دايما" متورطين معهم "منا وضدنا" وهني ألد أعداءنا...
والباقيين شايفين وساكتين..
أو شايفين مش قادرين يعملوا شي..
على كل الأحوال النتيجة واحدة..
القرار اللبناني الحر مصادر منا..
شو منعمل..؟
منبكي عالأطلال..؟
وللا منِنطرهم يِبعتولنا "بواخر" متل ما كانوا يقولولنا.....
وألاّ يهجرونا كلنا..
وهيدا هدفهم يفضوا الأرض من أهلها..
والهدف الأول لايهمن أنهن يفضوا الأرض من أهلها..
يضربوا كل تفوّق بلبنان..
ممنوع نحنا نكون متفوّقين، ممنوع !!!!.....
..والنتيجة..شو منعمل..؟
نقعد ننطرهم في بيوتنا هيك..؟.. لأ..لأ..لأ..
بعدها الورقة الأهم بإيدنا نحنا لنواجهم فيها..
في وحدة علينا( عائلاتنا)..
هالورة المباركة ماتستقلوا فيها..
مامغترب ناعم يطلّع بأهله في لبنان ويساعدهم..
مافي عيلة إلاّ عم يتضامنوا أفرادها تيواجهوا هايدي المصيبة..
بعدها الناس للناس..
وبعدها الدنيا بخير..
..النتيجة..أولادنا بعدهن بالمدارس وشبابنا بعدهن بالجامعات ولو بطلوع الروح..
بس بعدهن
..وراية الثقافة والفنون الجميلة والإعلام الحر بعده عالي ومرفرف رغم ياللي قتلوهم..
عالي ومرفرف وبعده لبنان منارة الشرق العربي كله..
وبعده الرائد بكل مجال.
..وبعدها طرقاتنا مليانة ناس مكملين طريقها صوب المستقبل..
وشواطئنا وجبالنا مطاعمنا مليانة محتفلين بالحياة..
ومغتربين راجعين على قلوبنا على بيوتهن متل دائما"..
..وألاّ مش محتفلين ومش مبسوطين وقاعدين في بيوتهن عالشمع سهرانين وعالقمر سهرانين وعلى ماشي سهرانين لأنهن تعبوا من هالمسلسل مابقى يخلص
هالحلقات الدمار والخراب والموت بيضلو ماشي مكمل ماشي معنا من ال75 لهلق..
..بدنا نعيش..
..الناس بدها تعيش..
..ماتسالوا ليش الطرقات مليانة ناس..؟
ليش المطاعم مليانة ناس..؟
ليش الدنيا مليانة مغتربين..؟
بدنا نعيش..
ماتخافوا عالأرض معها وقت ترجع..
لبنان عمره أزلي..
معه وقت يسترجع قراره الحر المصادر منه عمره الأزل
طوى كل الإحتلالات وبقى..
هيك بيقول التاريخ..
..من هلق لوقتها..
مابعرف أمتى وقتها..
ع وقتنا..ع وقت أولادنا..
ع وقت أحفادنا أو أحفادهم وأحفاد احفادهم..
بعرف في وقت بدو يجي
لبنان يسترجع قراره الحر..
بين هلق لوقتها..
شو قادرين نعمل..؟
بيكفي تكون جامعاتنا ومدارسنا مفتوحة..
وراية الثقافة والفنون الجميلة والإعلام الحر مرفرفة لحتى نقول روح لبنان بخير..
يعني حياته فينا..
.. يعني نحنا كلنا شهود سيادته واستقلاله..
نحنا كلنا جنود بالجيش اللبناني الحبيب..كلنا..
..كل واحد طرح ماهو مزروع عنده كل واحد يعتبر حاله مسؤول أول عن لبنان.
..مين قال الحروب دبابات بس..؟
..الحروب كمان ثقافة وفنون جميلة وإعلام حر..
وإلاّ ماكانت انقتلت الناس وصار إسمها شهدا إلها كل مكانة بقلوبنا..
..شوي تضامن..شوي..بس شوي..
تعتبر هيدا الزمن الرديء..
والله معنا..
لأنه الله مع الحق..
مش عم جيبو من عقلي هالكلام..
شوية محبة مباركها الله بالسماح وحكي فيها منكسر شوكة أكبر شر.
..بتطلّع بصمود الشعب اللبناني..بالشعب الجبّار..
ياللي لا بتلويه..
ياللي لما بتلويه مابينكسر..
ياللي لما يوقع مابيركع..
ياللي لما بيستسلم مابيستسلم وبيفضل يموت..
..لما بتطلّع بصمود هالشعب العظيم الجبار ياللي طوّع المستحيل..
وتكيّف مع كل مصيبة وركّعها..
..بتطلّع عهالجبال بلبنان..
بتطلّع بالسما..بتطلّلع بالبحر..
وبطلع ع "أنوبين" بسمع كل شيء
وبيقوللي:
"ماتخافي عالأرض..
ماتخافوا..ماتخافوا..
#متل_السما #لبنان"
